حمام الفايف ستار ........ يبقى انت اكيد اكيد فى مصر

من كام يوم كده هفنى الشوق اننا نخرج فى مكان جديد

قلت لابو العيال يلا تودينا القلعه اللى هى قلعه صلاح الدين وخصوصا انى مرحتهاش من ايام الكليه

وبصراحه الراجل ماتاخرش انه يودينا ورحنا يوم الجمعه الصبح على القلعه

والجو كان حلو اوى اوى ودخلنا القلعه وبصراحه المكان ظريف اوى اوى

بس طبعا رحلات المدارس يوم الجمعه مبوظين الدنيا من الرخامه والاستظراف على الناس وطبعا على الاجانب اللى هما من كوكب تانى طبعا ومش بشر زينا كده

واحنا قعدين كده قلت اقوم ازور الحمام واخد روكو معايا حاكم هى مش بتسترمعانا ابدا وخصوصا فى المشاوير الطويله

ووسالت على الحمام فين يا جماعه قالولى هناك المهم رحت وكان قدامى اتنين من الاجانب

والست اللى واقفه على الحمام قامت وقفت طبعا وفتحتلهم باب الحمام علشان يدخلوا و ادتهم مناديل طبعا وقفلت باب الحمام على طول

وانا جايه وراهم قلت يبقى ده اكيد الحمام بقولها هو ده الحمام

قامت رده عليا وحواجبها تمانيه وتمانين : الحمام جوا على طول فى الاخر

وقمت سالتها : مش ده حمام اللى الجماعه الاجانب دول دخلوا برضو ولا حاجه تانيه

ردت عليا : ايوه حمام اما ايه يعنى

قلتلها طيب لما هو حمام ليه بقى اللى جوا فى الاخر

قالتلى : علشان ده مخصوص علشان الاجانب بس

والله العظيم فى بلدنا عملنا حمام علشان الساده الاجانب يدخلوا بس وميحتكوش بلمامه الشعب

وتشوفوا بقى الحمام اللى فى الاخر ده و وهو مليان ميه على الارض وعلى قد حاله اوى اوى

حتى الحمام فى بلدنا مش عارفين يكون ادامى

حتى الحمام بيداس علينا فيه

ولا احنا بتعمل ريحه وحشه وهما بيعملوا برفانات عالميه

اظن احنا الدوله الوحيده فى الدنيا اللى ممكن تعمل فى اولادها كده

يكونوا طابور خامس حتى على ارضهم والغريب هو اللى بيتحط على الراس

وليه ده ميكونش ده نظيف زى ده ولا هى النظافه ليها ناسها

هو الراجل عاوز ايه من الست والست عاوزه ايه من الراجل

بجد كل ما افكر فى الموضوع استغرب اوى اوى من الحياه اللى احنا فيها

طرفا الحياه الراجل والست طرفين المفروض انهم طرفين متكاملين .

بس بجد والله بحتار الراجل ااه المفروض القائد اللى بيقود العيله والست بتاعته لطريق صحيح بس للاسف بنلاقى الراجل غالبا

من فرط فرحته باللى ربنا ادهولوا انه بيقود الست اللى معاه وفرفيهم العيال بيمارس كل سلاطته انه يكون انانى

ااه الراجل غالبا انانى بيعمل الحاجه اللى بتشبع حاجته هو الاول واللى بترضيه نفسيا الاول

ولو مش عاوز يعمل الحاجه وماهياش على معدته لا يمكن يعملها

يبقى الست عاوزه الفا والامان والحضن والطبطبه فى اى وقت ومش شرط يناسبها ده ممكن يعملها فى اى وقت وتكون مبسوطه

وطبعا لو عاوزه حاجه يديها تقول عاوزه فلوس يقولها خدى

عاوزه لبس يقولها خدى

عاوزه دهب يقولها خدى

اصل احنا يا ستات هبل اوى وبيضحك علينا بالحاجات دى

ومش معنى ده ان كل الستات بترفرف بجناحات بالعكس فى ستات عاوزين ضرب النار فى ميدان عام

وفى ستات نكديه مقرفه ومش بترضى باى حاجه حتى لو الراجل اللى معاها زى الفل

والراجل هو اللى بيقود مختلفناش بس الراجل ده عاوز ايه من الست بتاعته

عاوزها طبعا فول اوبشن زى العربيات كده

تكنس تمسح وتبقى ست زى الفل وتبقى ست نغشه فى اى وقت واى مكان وطبعا طباخه بريمو بتعمل كل حاجه زى العسل زى احسن شيف وحلوانى فى مصر

هى دى دايما دى الصفات العامه اللى كل واحد عاوزها فى الست اللى عاوز يجوزها

بس والله فى ناس بتحب بعضها اوى ومهما حصل بينهم لا مكن يفترقوا ابد ا حتى لو حصل ايه

الرجاله على طول ندمتنين على انهم اتخطفوافى سبابهم بالجواز اللعين اللى خلهم متكعبلين بالولاد ومسئوليات كتير

وانه لو مش متجوز كان زمانه عمل كل اللى فى نفسه وجاب كل الحاجات اللى كان نفسه كان يجبها

والستات على طول بتسب وتلعن فى الراجل اللى هى قاعده معاه وانها خلاص مربوطه بالعيال اللى هما ربطنها ومش عارفه تعيش حياتها

كل واحد مش عاجبه حاله ابدا . وكل واحد فاكر نفسه هو اللى صح والتانى هو اللى حمار وموصلش لطريقه تفكيره

وانه طبعا لا يمكن يعترفب اخطائه واى واحد يتسابق فى انه يخلى الطرف الثانى انه يعترف اانه غلطان ويعترف بغلطه احسن طبعا علشان المشكله تنتهى

بجد كان الله فى عون كل ست مها راجل مش فاهمها

وكان الله فى عون كل راجل مراته مش فاهماه

كرامه المصرى ........... بخ

اللهم لا اعنراض فى اى حاجه

بس هو ليه كده على طول فى حاله دفاع عن النفس

على طول بناخد على قفانا ولا بنرد

على طول متمسكين بشعارات فاضيه ولا ليها اى قيمه اصلا " اصل الوحده العربيه " " اصل احنا وطن واحد" اصل احنا اخو"

اخوه مين احنا كل واحد مننا ماسك سكينه للتانى ومخبيها ورا ضهره مستنى يضربه فى اى لحظه

من شويه سمعت ابراهيم حجازى وهو بيقول تن المصريين لايمكن يقاتلوا اى حد ولا يمكن يقهروا حد مصر دايما الاخت الكبيره

ما هو احنا على طول تحت رحمه الكفيل فى دول الخليج اللى يببيع ويشترى فيك على كيفه علشان لقمه العيش

واحنا على طول تحت رحمه الدول الغربيه وامريكا علشان متقطعش علينا المعونه اللى هى حياتنا

واحنا اللى على طول تحت رحمه دول المغرب العربى سواء الجزائرين او التونسه علشان خاطر الاستثمارات المصريه اللى هناك

المهم ان احنا دايما تحت رحمه حد . حد يزلنا ويحط مناخرنا فى الارض على طول

طيب ما احنا فى بلدنا حطين بوزنا فى الارض من الحوجه والفقر وقله الحيله

يبقى ليه بقى بقى الاغراب ميعملوش كده واكثر

ده بيحصل على طول علشان على طول مدين ادينا . الفقر والحوجه اللى عمل فينا كده

الحكايه مش حكايه ماتش اتغلبنا فيه ولا حتى فزنا فيه

الحكايه انها الحاجه اللى اظهرت اللى فى النفوس . واظهرت برضو قله حيلتنا فى اى حاجه

احنا كلنا بنحب مصر معملتش فينا حاجه بس كرهنا اللى عمل كده فى مصر

يا جزايرين وكل اللى زيكم طوزز وفى مليون داهيه

الللهم لا اعتراض دى مشيئتك يا رب ولا اعتراض عليها

بجد بجد كرامتنا انتهت ومحدش يقول وحده عربيه ولا بتنجانيه

نفسى اكون عروسه تااااانى

مع انتى عملت فرح ولبست فستان ابيض وعملت كا المراسم بتاعه الافراح

نفسى البس تانى فستان فرح واكون عروسه

البس فستان اكون مختاره وماجره زى ما عملت اول مره وعلى يلبس بدله سودا حلوه ونتصور

والبس حمزه بدله شبه بتاعه باباه . والبس رقيه فستان ابيض وبعد الصوره اللى اتصورها انا وعلى نتصور بالعيال

قلت لعلى الفكره دى قاللى حتبقى كويسه حتبقى كويسه

بس بجد انا عاوزه اكون عروسه تانى و نروح نقعد على البحر ونتمشى ونتصور زى العرسان على البحر

نفسى اعمل فرح تانى . وعريسى يجبلى ورد ابيض مع احمر و اكون فرحانه نفس فرحه الفرح

وجايز احس باحساس جديد اما اشوف اولادى مبهورين باللى احنا عملينه

على بيقولى ان ده جنان قلتله امشى ورايى بس واحنا نعملواوانت حتنبسط وانا كمان حتبسط اوى

انا عاوزه اكون عروسه والبس فستان. مليش دعوه

البوتى يا عينى على البوتى

الاستاذ حمزه بقى عمره دلوقتى سنه و3 شهور . وطبعا كان لازما على كأم تربويه ابدا اعوده على البوتى

والبوتى للى مش يعرفها هى بالبلدى كده القصريه اللى كنا بنعمل فيها زماااان

بس قلنا خلينا ناس كويسين ونقول بوتى احسن وشكلها احلى من قصريه دى

وعلشان على يترحم من البامبرز اللى بقاه عندنا زى الاكل والشرب

المهم نقوم الصبح ونقلعه البامبرز واقعد يا مازو علشان تعمل بيبى

واقعد انا وابوه نغنيله الاغنيه اللى كنا مقلقينها اما كنا بنعود روكو على البى بى

ونعنى وبصوت عالى " بى بيه بى بيه مازو بيعمل بى بيه " . وكنا قبل كده بنقول روكو

وده لا على حامى ولا على بااارد ويقعد يعييييط وبصوت عالى اوى

تخيل نفسك لسه صاحى من النوم وعيل يقعد يصوت جوه صرصور ودنك

وكانك مقعده على شوك ويقعد يعيط ويصوت وانا وابوه نقول يالا يا مازو اعما بى بى

وبرضو مفيش اى فايده

ووصل بيه الحال انى اخد البوتى هانم على رجلى وهو قاعد عليها علشان يرضى يعمل اى حاجه وهو لايمكن ابدا

واقعد العاب انا وعلى ونهشتك علشان البى بى يتعمل ومفيش اى اى فايده

واحنا جبنا بوتى جديده على شكل عربيه وعلشان يرضى يعمل فيها ولا اى حاجه نافعه

ولعبته كل الالعاب وبرضو مفيش فايده .؟ واقوله يا بنى ظفرها بس حتى وهو مش عاوز

شكل البوتى دى انا اللى حعمل فيها اخر ما اصاب بالياس

وصوره البوتى الملكيه دى اهداء لمازو علشان اقوله " بى بيه بى بيه ماوز مش عاوز بى بيه"

مؤتمر الحزب الوطنى اتفرج واضحك

من كام يوم كده كنت قاعد الصبح وبقلب فى التليفزيون لقيت على قناه المحور مؤتمر الحزب الوطنى

فلت وماله اما اسمع بيقولوا ايه . ويا ريتنى ما اقعدت اسمعه والله مت على نفسى من الضحك

بس والله يموت من الضحك سمعت احمد عز الراجل الغنى بتاع الحديد واللى متجوز ست برضو غنيه بيكلم عن ايه بقى

بيكلم ان الحاله الاقتصاديه زى الفل وان كل حاجه تمام وان مصر تطورت فى عهد الرئيس مبارك طبعا . ةان السنه اللى فاتت اتباع بتاع

250 الف سياره وان ده دليل على ان الناس مرتاحه وكله ميه ميه وان ده شعب ابن ستين فى سبعين ومش بيقدر جهود الحكومه والحزب

وطبعا وجه تحيه لجمال اللى هو رائد مفجر ثوره التحديث والتطوير . وسمعت الكلمتين دول ومت على نفسى من الضحك وقلت فى عقل بالى

هو جمال اصلا عمل ايه فى البلد علشان يكون مفجر ثوره التحديث . وانهى تطوير اللى جمال فجره فى وشنا

ده كل اللى قاله فى الخطاب بتاعه هو ان الشعب المصرى ده اصلا مش بتاع شغل ومش بيحب يتحرك بس كده

والمفاجات زادت اوى والقرع اشتغل ووكلمه لكلمه من نائب فى مجلس الشعب لحد ما نوصل لرئيس رابطه على قده كده

وكلهم مشين فى خط واحد بس هو القرع والنفاق اللى هما شربينه ولازم يرجعوا فى ودانا . علشان نعرف الحزب قد ايه جميل ومريح وكله

بهجه وجمال هو صانع البهجه دى . ده وصل القرع انه جابوا رئيس رابطه مزارعين مش عارفه بلد ايه كده

طالب الحكومه انها تزاود وتشيل الدعم على رغيف العيش . يا خبر اسود ومطين بستين نيله واحد مصرى فلاح عادى يعنى اكيد مش

بيشترى العيش اللبنانى عاوز العيش يغلى يا صلاه النبى احسن . وصل بيهم الامر انهم بيخلوا الناس يبيعوا ضميرهم

ويبيعوا البلد والناس كلهم علشان خاطر الحزب وعلشان خاطر عيون جمال المفجر .

حسبى الله ونعم الوكيل

هى بيانسيه جايه ملط امتى؟

الا مش صحيح احنا مش فى نكبه حقيقه ولا بيكدبوا علينا

مش لسه جثث قطار العياط دى مرميه على الارض ؟

هو مش لسه دمهم مبردش اصلا

هو مش لسه دموع اهليهم واماهتم واولادهم منشفتش

بس هى البجاحه دى جت منين . يكون عنك ميتم فى الشارع بتاعك وقدام بيتك وتروح تعلق الانوار علشان الفرح

لا واللهدى حاجه تفور الاعصاب نكون عندنا حادثه كبيره كده زى قطر العياط ده ونروح نجيب الست بيانسيه علشان تواسنا شويه

ماهو ساعه لربك و50 ساعه لقلبك . وواللى زاد وغطى كميه الاعلانات اللى كل شويه يجبوها علشان الحفله

وتظهرلنا الست بيانسيه برجليها العريانه عاشان ترقص وتمايل

اهم حاجه الشعب المصرى يتبسط

بس والله لو كان الشعب المصرى هو اللى حيتبسط كنا قلنا وماله بس اللى حيتبسط هما الكريمه

ااه والله كريمه المجتمع اللى قدرين يروحوا حفله اكلفت مئات الملايين

واللى بيقدروا يدفعوا تذكره لحفله واحده بتعنى وترقص فيها ب 1000 و2000 جنيه اه والله اسعار التذاكر كده

اهم حاجه ان محبى الاخت بيونسيى يفرحوا والبلد فيها ميتم كبير

علشان احنا دمنا ارخص حاجه فى عيون بلدنا . واللى هما عاوزينه حيعملوا سواء اعترضا اناه تيجى ولا لا

اهم حاجه بقى بيونسيى تعمل بملاينا اللى هى وخدها وتبين كوارعها كويس. الست واخدلها يجى مليون ونص دولار كده

عشنا وشفنا

واخيرا والحمد لله عشنا وشفنا ان فيه وزير استقال

الحمد لله شفتها قبل ما اموت

وزير وزير قاعد فى الحكومه يستقيل

ده بيحصل اللى انقح من كده 100 مره وبرضو محدش بيهون عليه يسيب الكرسى

زى ما يكون الكرسى لازق فيهم

بس اشمعنى الريس قال لوزير الثقافه لما اتوكس فى انتخابات اليونسكو حط ورا ظهرك ومطيبش خاطر وزير النقل وقاله برضو ارمى ظهرك

اكيد غلاوه وزير الثقافه اكتر بكتير من غلاوه النقل

برضو عشره بقالها 28 سنه ماتت ناس وحيى ناس

ووزير الثقافه مرضيش يستقيل علشان مينولش اليهود اللى فى بالهم

طب ينولنا احنا اللى فى بالنا

حد يلحقنى من حمزه

حمزه ابنى انا خلالالاص مش عارفه اعمل معاه ايه

الاستاذ حمزه اولا بيصحى كل يوم ومن اول ما اتولد وهو لازم يصحى الساعه6 صباحا او قبل كده ومش بعد كده الا فى حالات نادره جدا
تانى حاجه بيقوم الصبح وهو على عاتقه ومهمته الاولى انه ازاى ميخليش حاجه فى حالها ابدا بدايه من السجاد وحتى التليفزيون والكمبيوتر
يقوم يوقع كل حاجه وينزل كل حاجه ويكسر كل حاجه
ومش بيقعد ابدا
اقول اشغل التليفزيون علشان يلهيه شويه ولا بيلهيه ولا حاجه
يقوم طالع من ترابيزه التليفزيون لحد فوقه ويخبط عليه جامد اوى او انه يلطلع يقعدفوقه من غير اى خوف انه يقع مثلا
يدخل جوه الغساله الاتوماتيك ويدخل الاوضه ويقفل على نفسه وافتح الباب يقوم قافل الباب تانى وهكذا نفضل على الحال المنيل ده لحد ما انا اللى اتعب. كله كوم بقى الحمام كوم تانى حمزه بيه بيموت فى حاجه اسمها حمام سواء فيه حد او مفيو ش
يعمل بقه اللى ربنا يقدره عليه يرمى الشامبوهات جواه التواليت
او ياخد الزهره بتاعه الغسيل ويلون بيها الارض علشان لونها مش عاجبها
او يفتح الميه ويمشى او يحط راسه جواه التواليت يعنى يعمل اى حاجه مقرفه
يخلص الحمام يروح المطبخ يفتح دواليب المطبخ ينزل الحلل او يوقع الزيت او يقلب الدقيق او يقلب السكر

امبارح قاعده فى الاوضه بشوف الاخبار وفجاه كده مسمعتش اى صوت ليه قلت اااه ده فى مصيبه كبيره اوى اوى
رحت المطبخ ويا ريتنى ما رحت لقيته قالب تقريبا نص زجاجه زيت وعليه دقيق وشكل الارض مش طبيعى
قلت بقه احط عليهم سكر واعمل كيكه اكلها بدل ما اكل فى نفسى
بيتنك بقى عامل زى ما يكون حد دخل يفتشه ومشى على راى على هو امن الدوله فتشت بيتنا ولا ايه
بكنس الاوضه فوق ال 3 مرات كل يوم
بشيل الهدوم اللى بيوقعها من الدواليب وبيجرى اكتر من 5 مرات فى اليوم
بلم وراه طول اليوم
بيطلع فوق كل حاجه واى حاجه
وركو والله من اول ما بتيجى من المدرسه وهى وراه
مش بعرف اقعد فى اى حته او مكان وهو معايا .بيزهق كل اللى حوليا طبعا وبيجروا وراه معايا
شاهى ونورا حلفوا بحياته يوم ما اتقبلنا
حد يلحقنا منه والنبى
.
ربنا يهديه يا رب ويخليه لينا
الا هو ان شاء الله ربنا بيهدى العيال على سن كام ؟
علشان اطمن وارتاح
علشان انا تعبت والله

اغيثنا من يا رب

اللهم لا حول ولا قوه الا بالله العلى العظيم
حنقضل امتى فى بلدنا نداس ونموت وملناش ديه من اى حد
لما فتحت التليفزيون ولقيت خبر تصام القطارين العياط والله العظيم اتنكدت جدا
يا خبر اسود هو احنا مش حنسلم من اهمال حكومتنا
نعمل ايه بس يا رب الضرايب وبندفع
كل خطوه فى البلد دى بفلوس وبندفع
كل رسوم تزيد على اى حاجه وكل حاجه وبرضو بندفع
دفعنا كل حاجه علشان نعرف بس نعيش ومش عارفين
دفعنا ولادنا اللى كل يوم بيموتوا من الاهمال فى المستشفيات والسرطان والبلاعات المفتوحه وبرضو مداسين
دفعنا روحنا ودم اجدادنا علشان ندافع عنها ونحميها وهى محمتناش
دفعنا حتى نفسنا اللى هو رخيض اوى عند الحكومه وبرضو منفعش
دفعنا دموعنا وقله جيلتنا وقهرنا وبرضو متنصفناش من حد
نعمل ايه بس يا رب
نعمل ايه واحنا كل حاجه فى البلد دى بتخر قذاره وعفانه واهمال
للكى الله يا ام ياللى مستنيه ابنك وهو راجعلك
لكى الله يا اختى ياللى مستنيه جوزك يرجعلك
لك الله يا ابنى يا اللى مستنى ابوك يدخل عليك ومش حيدخل عليك تانى
كفايه علينا اعلانا رمضان بتاعه السكه الحديد اللى دفعناها من دم قلب كل واحد فينا ودفعنا 30 مليون جنيه علشان طارق نور والحاشيه تسترزق واللى خدعونا فيها وقالولنا انهم جددوا كل حاجه
كفايه ان الاغنياء زادوا غنى والفقراء مش لقين ياكلوا
كفايه بقى دوس على رقبينا كل ده
بقينا فى بلدنا اغراب مش عيشين

لكى الله يا مصر
لكى الله يا مصر

وانا لله وانا اليه راجعون
ولا حول ولا قوه الا بالله العلى العظيم

طول ما انت بخير

طول مانت بخير انا بخير انا متطمن عليك
انا شايفك سنة والتانية بتكبر وبشوف روحى فيك

بتمنالك عيشة حلال ستر وصحة وراحة بال
عين مليانة ورضا بالحال
بدعى تكون بعدى وحياتك سند ف الدنيا لاخواتك ويقولو ابنى راجل عال

دمعك تعبك نقط ضعفى عايزك جد مستعفى حبيبى ماتنكسرش ف يوم

مش انت طول عمرك بتقلدنى عايزك تبقى زى اوعدنى ف عز ضعفك شد وقوم

و طول مانت بخير انا بخير انا مطمن عليك
انا شايفك سنة والتانية بتكبر وبشوف روحى فيك


اغنيه رائعه لهشام عباس سمعتها بالصدفه وطبعا كلماتها فيها ريحه المبدع والرائع ايمن بهجت قمر والى بيكتب كل احاسيس البشر على ورق شفاف مفيش بينهم حواجز

هو احنا صحيح مرضى ؟

هو صحيح الناس كلها مريضه

هو صحيح الناس كلها مصابه بامراض نفسيه حتى لو كنا كلنا ظهرين قدام بعض اسويا

بس احنا فعلا كلنا عندنا شيزوفرنيا . كلنا بنقول ان احنا بنكره الكدب وبنكدب

بنكره السرقه وبنسرق

نكره الخيانه وبنخون

وبنظهر مثالين اوى اوى

شفت مره فى التليفزيون برنامج بيسال الناس انت بتكذب ؟

كل الناس قالت لا طبعا مش بعرف اكذب بيبان عليا( يا سلام )

ولو سالت الناس بتسرق حيرد عليك برضو ب لالالالالالالالالالا انا عمرى ما سرقت

ليه عمرما حد سرق ان شاالله نظره مش من حقه انه يسرقها

عمر ما حد سرق نجاح حد

عمر ما حد سرق عقل وعمر حد تانى

اكيد كلنا اتسرقنا وسرقنا

وطبعا الكذب حدث ولا حرج

ولو سالت الناس برضو انت خنت قبل كده حيقولك لا اكيد الخيانه مش فى طبعى

مع ان الخيانه فى طبع ناس كتير اوى

اللى خان بتفكيره فى واحد تانيه غير مراته واللى خانت بععقلها وتفكرها فى واحد تانى غير جوزها مش دى خيانه برضو

واللى بيجيب سيره حد بيعمل قدامه انه حبيب مش دى خيانه

امال لو الناس كلها مش بتكدب ولا بتخون ولا بتسرق

امال الدنيا ليه وحشه وفيها ناس وحشه كتير

امال مين اللى بيكدب ومين اللى بيخون ومين اللى بيعمل حاجه وحشه

امال مين ولاد الذينا ؟

امال الشيطان بيشتغل على مين ؟

الشيطان بيشتغل على كل الناس

سبحانك يا رب دى حكمتك وحنا راضين بيها

اللهم انا لانسالك رد القضاء ولكنى نسالك الطف فيه

المدرسه وبلويها واللى بيحصل فيها

الانسه روكو والحمد لله لما دخلت المدرسه كنا مبسوطين

وكل يوم لنا ترجع بعمل فيها ام تربويه واقعد اسالها عملتى ايه اخدتى ايه لعبتى مع مين والحاجات اللى زى دى

والبنات بطبيعتها لكاكه اوى تروحى فى حته تروح وراكى وهى قاعده فوق ودانك ومش عاوزه تنزل عليها ابدا

المهم بقولها بتلعبى مع مين من اصحابك قالتلى صفيه وفرح ونسيبة ( حصرى ازهرى طبعا)
ومن الولاد يحيى و عبد الله ( الست عامله شله)

وقامت مكمله انها بتحب الاخ عمر اوى

وكمااان اما يبقى عيان لازم نروح نزوروا قلتلها طبعا يا حبيبتى من باب ان دى زياره مريض

واللى غطى ووطى راجعه زعلانه علشان مش بتركب الباص بتاع الاخ عمر

اصل انا بحبه مووت اوى يا ماما ( البت بتعترف )

وانا بعض على ايدى من الغيظ

ادى المدارس ما هى كانت قاعده فى البيت

الحمد لله دخلت المدرسه

رقيه دخلت المرسه يا نااااااااااااااااس

الحمد لله وبعد عناء وطول انتظار وزهق وملل من كل الاطراف
روكو هانم دخلت المرسه والحمد لله
الوقت طول اوى اوى فى قعدتها فى البيت زقنا من كتير العراك اللى كل شويه بينها وبين اللى يتفاتله البلد حمزه
كل شويه يا اما بيصوتوا يا اما هى بتجرى وبتعلب ما هى معذوره برضو من زهقها
فكرتنى بحالى اول يوم فى الدراسه كنت بكون فرحانه اوى اوى
مش طبعا بالدراسه لاسمح الله ولا لانىبحب التعليم لدرجه انى متشوقه للدخول كنت بحب الدراسه لاسباب كتير
كنت بحبها علشان حخلص من خنقه البيت
كنت بحبها لانى حخرج كل يوم
كنت بحبها علشان بحب الفسحه والمقصف اللى هو عند ناس تانيه الكانتين
كنت بحبها علشان وانا راجعه البيت بتمشى مع اصحابى براحه اوى علشان اطول المده وماما تزغقلى
كنت بحبها علشان خلاص مش هعمل مع ماما حاجه فى البيت علشان انا مش فاضيه ولا عندى وقت
كنت بحبها علشان الجزمه الجديده والشرابات الجديده والشنطه الجديده
كنت بحبها علشان فيها كل حاجه حلوه ماعدا التعليم نفسه ولان الواحد طبعا بيتعرض وهو صغير احيانا لبعض المدرسين المعقدين نفسيا
او مدرسه جوزها ضربها على الصبح وهى على اخرها وهطلع ده علينا
مسكينه الكتكوته فرحانه اوىوفى عنيها نشوه الفرح مع انها حتبدا رحله شاقه اوى طولها 18 سنه
رحله بتتعرض لكل انواع السيطره والتسلط من كل الناس بدايه مننا مامتها وبابها وحتى اخر داده عندها فى المدرسه مرورا طبعا بالمدرسين والاخصائيه ومدرسه الرسم وحتى اى مدرسه بتعمل حاجه مش مهمه
وطبعا المدرسه بتكثف جهودها اول السنه فى الطلبات وطلبات ليها لازمه وملهاش دول لدرجه طالبين حاجه اسمها ورق كانسون وكمان حاجه اسمها بلوتاك والله مش عارفه ايه هو البتاع ده وبيجاب منين من المكتبه ولا من البقال

وطبعا كلنا عارفين ان العلم لايكيل بالمال لكن يكيل بالبتنجان

المهم خليها فرحانه وانا كمان فرحانه اوىاوى انها نزلت وراحت المدرسه
عقبال الكتكوت اللى فى بالى يا رب

لسه الامانى ممكنه

هو الواحد لما يوصل لسن الثلاثين يقدر يحقق حاجه فى حياته

هو سن التلاتين بدايه ولا بدايه النهايه

هى مش نظره تشائميه ولا حاجه بس هى شويه افكار

اما تحس انك وصلت سن التلاتين وانت محلك سر ومعملتش حاجه

معملتش حاجه تذكر فى الدنيا لاخير ولاشر

عادى انسان واقف فى نفس المحطه اللى فيها

بتحس الناس ماشيه تتفرج عليك علشان المحطه فاضيه ومفيش قطارات حتعدى خلاص

وانت برضو لسه مستنى ومش عارف مستنى ايه ولا مين

يارب

مش عارفه هو لسه الامانى ممكنه

الله يسامحك يا شيخنا

رساله من العبد الفقير الى شيخنا الجليل

من موطنه مصريه عاديه جدا جدا بتقولك من غير رياء او نفاق
ربنا يصلح حلنا وحالك

يا شيخنا الجليل انت رمز من رموز الدين اللى يمثل اكبر موسسه دينيه فى مصر
تعبنا يا شيخنا من انك بتسمع كلام حكومتنا الجليله
ففى كل كتب الفقه والذى انت ادرى منا بها وكل اراء الفقهاء وكلهم اجمعوا ان فوائد البنوك ربا
وانت الوحيد اللى حضرتك قلت انها حلال ومفيهاش حاجه
قلنا انت ادرى شيخ جليل ولا كلام ولا جدال من ذللك

ولما شفت سفاح الحرب شيمون بيريز سلمت عليه بود واحترام كاملين
قلت وماله انا لازم اسلم على كل الناس المسلم وغير المسلم
قلنا يا شيخنا ده سفاح وبيقتل اخواننا فى فلسطين وبيشرد اطفالنا ويقتلهم
قلنا ماله انت ادرى بذلك

ولما شفت بنت صغيره فى سته ابتدائى ولبست النقاب
كنت جلاد عليهاوعلى كل اللى زيهم
ازاى يا شيخنا تجلد الاف السيدات المنقبات وتمنعهم من دخول معاهدهم وكليتهم
عينت نفسك الحاكم والجلاد عليهم
ونسيت ان ربنا نفسه قال لرسول الله لو كنت فظا غليظ القلب لنفضوا من حولك
وبعيدا عن حكم الدين فى الموضوع لانى مش متخصصه فى الدين زى حضرتك
بس زى ما قولنا ان اللى غير المحجبه تمشى زى ماهى عايزه ومحدش يكلمها او يتحرش بيها ودى حريتها الشخصيه
يبقى خلى المحجبه اللى مغطيه كل جسمها من اولها لاخرها على راحتها برضو وعلى حريتها الشخصيه
على فكره الموقف مش دفاعى بس تعاطفى مع الناس دى لانها ببساطه حره
وعلى موضوع انك لقيت كامراجل فى المدينه الجامعيه رجاله متنكرين فى زى منقبات
دى مشكله الامن اللى مش عارف يحكمها
ومشكله ضعاف النفوس اللى استغلوا النقاب للعمل ده
وميجيش على داغ الكل الكويس واللى مش كويس
فكرتنا يا شيخنا من موقف الامن من اللحيه واللى مربيها كان وقعته سودا
ده ربنا يا شيخنا قال للرسول لكم دينكم ولى دين

شيخنا الجليل ارفع يدك عنهم

شكرا شيخنا وارجو السماح على اى تجاوز

أسئلة ... أسئلة

امبارح وانا قاعده على الكمبيوتر ومندمجه جدا فى حاجات كتير اوى اولها اخبار انفلونزا الخنازير اللى معقده البشر فى كل الدنيا
جتلى روكو هانم تقولى ايه
- ماما
* نعمين
- هو باباكى فين اللى هو جدو يعنى (توضيح جايز انا مش عارفه )
قلتلها وانا مش باصلها:
* عند ربنا
- وماماتك
* عند ربنا برضو
- يييييييييييييه هو كل الناس عندك عند ربنا
* ااه
- هما عند ربنا ازاى يعنى
* ربنا نداه عليهم
- ازاى يعنى وهو ربنا هينداه عليكى انتى كمااان
* ربنا حينداه على كل الناس
0- يعنى بابا بابا اللى هو جدو برضو عند ربنا
* اااه
- طيب ربنا خلاص حينداه عليكى خلاص مش كده
* لما ربنا يكون عاوز ينداه عليا حينداه عليا حيناه عليا
- يعنى امتى يعنى ( قلقانه اوى على)
* محدش بيعرف امتى ربنا حينداه عليه
- اه ليه بقى
وانا والله كنت زهقت اوى اوى
* اهو نصيب
- يعنى ايه نصيب
انا وطبعا حدخل فى تفسير النصيب قعدت كده ثانيه والحمد لله لقيت انها ماسكه سندوتش متحنط فى ايدها قولتلها:
* اييييييييه ده انتى لسه مكملتيش السندوتش يلا بقى متكلمنيش الا لما تخلصى السندوتش بتاعك
واللحمد لله خلصت منها شويه
وبعدين
- ماما
* نعمين
- يلا بقى روحى لربنا علشان ربنا عاوزك يلا بقى
- بس مين اللى حيعملنا الاكل يا ماما وينظف البيت
- خلاص خلى طنط شاهى او طنط نورا تعملنا الاكل

وانا فى ذهول من النتيجه الباهره اللى هى وصلتلها لانها بتقول ورا بعض
وبس خلاص

ليه ؟

حاجات كتير اوى جواه الواحد مش عارف يطلعها

يطلعها ازاى والدنيا كده

ممكن يطلهعها علشان يرتاح

جاجات ملخبطه كتير

علشان كده قلت لنفسى
حكتب مذكراتى

حلوه ووحشه
مره وطعمه
لذيذه ودلعه

بس خلاص