من كام يوم كده هفنى الشوق اننا نخرج فى مكان جديد
قلت لابو العيال يلا تودينا القلعه اللى هى قلعه صلاح الدين وخصوصا انى مرحتهاش من ايام الكليه
وبصراحه الراجل ماتاخرش انه يودينا ورحنا يوم الجمعه الصبح على القلعه
والجو كان حلو اوى اوى ودخلنا القلعه وبصراحه المكان ظريف اوى اوى
بس طبعا رحلات المدارس يوم الجمعه مبوظين الدنيا من الرخامه والاستظراف على الناس وطبعا على الاجانب اللى هما من كوكب تانى طبعا ومش بشر زينا كده
واحنا قعدين كده قلت اقوم ازور الحمام واخد روكو معايا حاكم هى مش بتسترمعانا ابدا وخصوصا فى المشاوير الطويله
ووسالت على الحمام فين يا جماعه قالولى هناك المهم رحت وكان قدامى اتنين من الاجانب
والست اللى واقفه على الحمام قامت وقفت طبعا وفتحتلهم باب الحمام علشان يدخلوا و ادتهم مناديل طبعا وقفلت باب الحمام على طول
وانا جايه وراهم قلت يبقى ده اكيد الحمام بقولها هو ده الحمام
قامت رده عليا وحواجبها تمانيه وتمانين : الحمام جوا على طول فى الاخر
وقمت سالتها : مش ده حمام اللى الجماعه الاجانب دول دخلوا برضو ولا حاجه تانيه
ردت عليا : ايوه حمام اما ايه يعنى
قلتلها طيب لما هو حمام ليه بقى اللى جوا فى الاخر
قالتلى : علشان ده مخصوص علشان الاجانب بس
والله العظيم فى بلدنا عملنا حمام علشان الساده الاجانب يدخلوا بس وميحتكوش بلمامه الشعب
وتشوفوا بقى الحمام اللى فى الاخر ده و وهو مليان ميه على الارض وعلى قد حاله اوى اوى
حتى الحمام فى بلدنا مش عارفين يكون ادامى
حتى الحمام بيداس علينا فيه
ولا احنا بتعمل ريحه وحشه وهما بيعملوا برفانات عالميه
اظن احنا الدوله الوحيده فى الدنيا اللى ممكن تعمل فى اولادها كده
يكونوا طابور خامس حتى على ارضهم والغريب هو اللى بيتحط على الراس
وليه ده ميكونش ده نظيف زى ده ولا هى النظافه ليها ناسها
1 comments:
عشان الأجانب بيعملوا بيبي أحلى من اللي بيعملوه المصريين :)
أحسن
عشان تبطلوا تدخلوا حمام برة بيوتكم :P
إرسال تعليق