الثلاثاء، 4 مايو 2010

عيد ميلادك ده عيد ميلادنا كلنا

يشهد مصر النهارده يوم من ايم مصر المباركه

النهارده يوم جليل كايام مصر العظيمه .

النهارده عيد ميلاد الريس النهارده الريس كمل 82 سنه طبعا خمسه مخميسه فى عيون كل الشعب
النهارده كملنا 29 سنه من حكمك لمصر
كملنا 29 سنه طوارى
كملنا 29 سنه غلا ورا غلا لحد ما بقى ناس كتير على الحديده وكملن ناس بعتها
كملنا 29 سنه فساد وسوس بينخر فى عظم مصر
كملنا 29 سنه من استغلال السلطه والمهانه هنا وبره
كملنا 29 سنه فقر ومرض وذل
كملنا 29 سنه من قرف وهم وغم
كملنا 29 سنه ناس بتزيد غنى وناس بتعض فى الارض
كملنا 29 سنه وتعليم وصحه فى نقص
كملنا 29 سنه وهى كل يوم بتتنهب وتتاكل
كملنا 29 سنه ووالحزق هو اللى ماسكها وشانق كل واحد فيها
كملنا 29 سنه واحنا شايفنها مغتصبه ومتهانه وكلنا عمالين نتفرج عليها
كملنا 29 سنه وشايفين اولادنا كاتم على نفسهم سحابه سودا وبينخر فى جسمهم سرطان اسود

عايشين ومش عايشين وكاننا مضربين على دماغنا كلنا بنتفرج عليها ومحدش عارف يعمل حاجه
نعمل ايه طيب ناكل ولادنا ولا نلبسهم ولا نعيشهم عيشه كريمه ازاى
وعلى راى الريس النهارده لما شفته فى قناهبتحتفل كان بيدى المدام مصروف بيت 30جنيه وكانوا عايشين 100 فل وخمستاشر
طيب يا ريس عاوزين احنا كمان عاوزين نعيش با 30 جنيه ويكفونا ونعلم ولادنا زى ولادك وناكلهم كويس ونعيس كويس ورضيين
مش عاوزين نعمل اعتصامات علشان ناخد حقنا ويبقى ده الحل الوحيد اننا نقعد فى الشارع وبرضو محدش يسال فينا

بس خلاص
وعلى راى بلديتنا

كل عام وانت بخيييير

الأحد، 18 أبريل 2010

عن تجربه الفطام اتكلم واقول


كنت ناويه لما حمزه يبقى سنه و6 شهور افطمه من الرضاعه

ولانه مش من العيال المريحين وخصوصا بالليل بيبقى ماسك انه كل شويه عاوز يرضع علشان ينام

قريت كتير اوى اوى عن الفطام وانه لازم يكون تدريجى وحاولت بس للاسف كل محاولاتى جت بالفشل لانه عنيد جدا

ويكمل عمر سنه وست شهور واقول لنفسى حرام الجو ساقعه اما يبقى الجو كويس شويه

ويعدى كمان شهر واقول لنفسى نفس الكلام

ويمر كملن شهر والاقى نفسى بجيب حجج علشان ااجل الموضوع كله

ولان حمزه قاعد معايا من اول ما اتولد وانا مش بشتغل زى ما كنت ايام اخته

اكتشفت انى ارتبطت بيه اوى وانى انا اللى عاوزه اتفطم منه نفسيا

وانى بجد بحبه لدرجه لنى مش عاوزه اخليه يتالم من موضوع الفطام ولا نفسيته تتاثر بيه

ووقفت وقفه قدام المرايا اكلم نفسى زى المجانين واقول ليه ما هو زى كل العيال اللى لازما وحتما تتفطم فى يوم من الايام

ايه العبط والهبل ده هو انتى الام الوحيد اللى قاعده فى البيت بابنها

واتكلت على الله وانا قايمه يوم جمعه قلت لعلى خلاص انا من النهارده حفطم حمزه وشجعنى على القرار

وخصوصا انه شايف اد ايه هو متمسك بالرضاعه فى اى وقت وكل مكاان

وتعبت بعدها تعب جامد اوى من تكسير وتعب ومش قادره اقوم وسخونه

وقريفه من حمزه جامده اوى من عياط وزن علشان يرضع بس خلاص

الحمد لله قفلت المحل ورشيت ميه .

الجمعة، 12 مارس 2010

يعنى مبارك يمرض والشيخ طنطاوى هو اللى يودع


بقى الشيخ طنطاوى اللى هو مش عيان ولا حاجه واللى هو برضو نفس دفعه مبارك

واللى هو رايح زياره للسعوديه يموت فجاه ومبارك اللى عيان وبيشيل المراره محصلهوش حاجه

حكمتك يا رب

اهم ما فى الموضوع ان الريس بقى بخير وبياكل عسل وزبادى

ربنا يرحم كل مسلم ويشفى كل مريض

الجمعة، 26 فبراير 2010

مج نسكافيه


اعترف انى من الناس اللى بتحب القهوه بكل كافه اشكالها وانواعها اوى

وانى بحب قعده الاماكن العامه لنفس الغرض ده هو ان الكان بحكم عليه من القهوه بتاعته

بحترم اوى اوى المكان اللى بيقدم قهوه امركانى زى الكابتشنو و النسكافيه حلوه وطعمها كويس

بحس انه بيحترم الناس اللى قاعده وخصوصا من محبى الحاجات اللى زى دى

على زوجى منين ما نقعد فى حته واطلب نسكافيه يتريق عليا على طول ويقولى اجيبلك سيجاره

وخصوصا انه مش من محبى الحاجات اللى زى القهوه ولا اى نوع من المكيفات دى

يا سلام على قاعده البن البرازيلى اللى فى شارع صلاح سالم الصبح بدرى فى اسكندريه

والراجل يعملك مج نسكافيه ايه خطيييييييييييير اوى

وكمان يكون معاك حد غالى عندك وتقعدوا نحكوا فى كل حاجه والمحل يبدا يتزحم شويه بشويه وقدام الناس الجرايد

وكل ما حد يخلص جرنال الناس تجرى علشان تخدوا بعديه

انا شخصيا كل حدث مهم فى حياتى حكيته هناك وتكلمت مع صحبتى الغاليه شهيره على طول هناك وعيت هناك وضحكت هناك

والستات الكبار فى السن اللى متعودين يقعدوا فى المكان ده 30 و25 سنه كل يوم تلقيهم لسه قاعدين

وتحس انك بره نطاق الزمن وحاسس ان المكان بتاعك انت بس مع انه زحمه

ومع انى قضيت 5 سنين من عمرى بقعد فى المكان ده كل يوم بس ولا يوم زهقت منه

وافتقد المكان ده اوى وبحس ان الكافيهات الجديده اللى طالعه هى مسخ وتقليد من مكان زى ده

احلى حاجه فى الدنيا انك تشرب مج نسكافيه والدنيا بتشتى بره

احساس لا يقاوم


الخميس، 25 فبراير 2010

حسبى الله ونعم الوكيل فى رنا ماركت واللى ضميرهم رايح فى داهيه


من كام يوم كده كنا بنشتر حاجات ودخلت سوبر ماركت فى اكتوبر علشان اجيب شويه حاجات

رحت اجيب سيريلاك لحمزه علشان هو بيحبه

رحت جايبه السيرلاك ودفعت ثمنه ومشيت وبصراحه غفلتت انى اشوف تاريخ الانتاج وهى عاده فيه مش ولا بد برضو

اوااعمل السيريلاك بقى لاقى قوامه غريب مش زى كل مره احاول فيه يمين او شمال بالميه مش عاوز يتعدل

قلت اشوف تاريج الانتاج لقيته منتهى بقاله بتاع 6 شهور

يا خبر اسود ومنيل اكل اطفال وبتبعوا منتهى الصلاحيه ايه القرف اللى احنا فيه ده

النهم اتصلت بيهم علشان اقولهم جايز انهم ما اخدوش بالهم

الراجل رد عليه وقلتله الموضوع قعد يحلف بايمانات المسلمين كلهم انها مش من عندهم

ربنا يولع فى اللى معندهمش ضمير طيب افرض ان فى ام مخدتش بالها من حاجه زى دى وادته لعيلها كان ممكن يجرى له ايه

والاخ اللى قاوح فى التليفون واصر انه مش من عندهم كان موقفه قدام ربنا ايه

المشكله ان الضمير بقى حاجه ثانويه فى حياه ناس كتير اوى مننا ومش حنقول كلنا لان لسه فى مننا ناس كويسه

الاثنين، 22 فبراير 2010

اصحى بقى يا مصر لسه العيشه ممكنه










الأربعاء، 27 يناير 2010

الشتا والاكتئاب


انا من الناس اللى بحب لما اقوم الصبح افتح كل شبابيك البيت . بحس ان نور ربنا هو اللى لازم نشوفه

بحب احس ان الدنيا منوره بس بنور الصبح

ومش بحب نور اللمبه فى النهار وكمان بيوترنى

ولكن لما بيكون فى شتا جامد والجو ساقعه اوى بكون قافله الشبابيك وده غصبن عنى طبعا

الشتا جواه اكتئاب جواه ساقعه

بتحس انك سقعان حتى من جواك وحاسس ان الساقعه بتنحر فى عظمك

الشتا جواه الخمول والزهق من القعده لان الناس مش بتعرف تنزل فما بال بقى اللى عنده عيال وخايف عليهم

لانهم لما يجرلهم حاجه احنا اللى حنلبس اسود

الشتا ليله طويل ومش بيخلص

الشتا تلاقى الشوارع فاضيه من بدرى وتحس ان المغرب ده كانك مقرب على الساع 12 بالليل

انا مبحبش الشتا لانه بيحسسنى بزهق وكأبه جامده اوى

ربنا يعدى الشتا بقى علشان انا زهقت

الأربعاء، 20 يناير 2010

حمزه يا حبيبى ...... ربنا يشفيك

الايام اللى فاتت دى كانت ايام صعبه اوى اوى

كان حمزه ابنى عيان اوى فجاه وبدون مقدمات قعد يرجع كتير اوى وكل ما ياكل اى حاجه يرجعها

قلنا ده ترجيع عادى خالص واديته دوا ومفيش فايده . المهم ودنا للدكتور قالنا بدايه نازله معويه

المهم الدكتور اداله بتاع 3 حقن علشان يخف ومفيش فايده

المهم الحاله تطورات من سخونيه شديده مع الترجيع وكمان اسهال رهيب

يا عينى مكنش قادر حتى يرفع راسه من التعب

وصحب ده طبعا انننا رحنا المستشفى مرتين فى يوم واحد خوفا من الحراره العاليه اللى بعدا حسينا انه تاه عن الدنيا

وده خلانا خلاص قلبنا يوقع فى رجلينا واحس احساس غريب اوى انه ممكن لاقدر الله ميقمش منها

وكمااان فجاه كده افتكرت امى ربنا يرحمها مش عارفه ليه . وخفت اوى لتكون نهايه المشوار ربنا اذنها

وفجاه كده لقيت دموعى مش عارفه تنزل ازاى ومش قادره امسك الشيطان اللى احتل دمااغى

ولكن ربنا رحيم بينا والحمد لله الدكتور طمنا واداله شويه حقن كده

وطبعا نهيك عن الزن الزياده بس الحمد لله

يا رب لك الف الف حمد وشكر

يا رب انت الرحيم ارحمنى يا رب ومتورنيش حاجه وحشه فى الناس اللى يحبهم

يا رب انا شفت صدمه عمرى فى غياب امى عنى

يا رب لو كنت مقدر لى انى اشوف حاجه اى حد فارحمنى وافرغ على صبر سيدنا ايوب

يا رب يا رحيم ارحمنى ومتورنيش حاجه وحشه فى اللى هما اغلى ناس عندى

الأحد، 27 ديسمبر 2009

حمام الفايف ستار ........ يبقى انت اكيد اكيد فى مصر

من كام يوم كده هفنى الشوق اننا نخرج فى مكان جديد

قلت لابو العيال يلا تودينا القلعه اللى هى قلعه صلاح الدين وخصوصا انى مرحتهاش من ايام الكليه

وبصراحه الراجل ماتاخرش انه يودينا ورحنا يوم الجمعه الصبح على القلعه

والجو كان حلو اوى اوى ودخلنا القلعه وبصراحه المكان ظريف اوى اوى

بس طبعا رحلات المدارس يوم الجمعه مبوظين الدنيا من الرخامه والاستظراف على الناس وطبعا على الاجانب اللى هما من كوكب تانى طبعا ومش بشر زينا كده
واحنا قعدين كده قلت اقوم ازور الحمام واخد روكو معايا حاكم هى مش بتسترمعانا ابدا وخصوصا فى المشاوير الطويله

ووسالت على الحمام فين يا جماعه قالولى هناك المهم رحت وكان قدامى اتنين من الاجانب

والست اللى واقفه على الحمام قامت وقفت طبعا وفتحتلهم باب الحمام علشان يدخلوا و ادتهم مناديل طبعا وقفلت باب الحمام على طول

وانا جايه وراهم قلت يبقى ده اكيد الحمام بقولها هو ده الحمام

قامت رده عليا وحواجبها تمانيه وتمانين : الحمام جوا على طول فى الاخر

وقمت سالتها : مش ده حمام اللى الجماعه الاجانب دول دخلوا برضو ولا حاجه تانيه

ردت عليا : ايوه حمام اما ايه يعنى

قلتلها طيب لما هو حمام ليه بقى اللى جوا فى الاخر

قالتلى : علشان ده مخصوص علشان الاجانب بس

والله العظيم فى بلدنا عملنا حمام علشان الساده الاجانب يدخلوا بس وميحتكوش بلمامه الشعب

وتشوفوا بقى الحمام اللى فى الاخر ده و وهو مليان ميه على الارض وعلى قد حاله اوى اوى

حتى الحمام فى بلدنا مش عارفين يكون ادامى

حتى الحمام بيداس علينا فيه

ولا احنا بتعمل ريحه وحشه وهما بيعملوا برفانات عالميه

اظن احنا الدوله الوحيده فى الدنيا اللى ممكن تعمل فى اولادها كده

يكونوا طابور خامس حتى على ارضهم والغريب هو اللى بيتحط على الراس

وليه ده ميكونش ده نظيف زى ده ولا هى النظافه ليها ناسها




الأحد، 20 ديسمبر 2009

هو الراجل عاوز ايه من الست والست عاوزه ايه من الراجل


بجد كل ما افكر فى الموضوع استغرب اوى اوى من الحياه اللى احنا فيها

طرفا الحياه الراجل والست طرفين المفروض انهم طرفين متكاملين .

بس بجد والله بحتار الراجل ااه المفروض القائد اللى بيقود العيله والست بتاعته لطريق صحيح بس للاسف بنلاقى الراجل غالبا

من فرط فرحته باللى ربنا ادهولوا انه بيقود الست اللى معاه وفرفيهم العيال بيمارس كل سلاطته انه يكون انانى

ااه الراجل غالبا انانى بيعمل الحاجه اللى بتشبع حاجته هو الاول واللى بترضيه نفسيا الاول

ولو مش عاوز يعمل الحاجه وماهياش على معدته لا يمكن يعملها

يبقى الست عاوزه الفا والامان والحضن والطبطبه فى اى وقت ومش شرط يناسبها ده ممكن يعملها فى اى وقت وتكون مبسوطه

وطبعا لو عاوزه حاجه يديها تقول عاوزه فلوس يقولها خدى

عاوزه لبس يقولها خدى

عاوزه دهب يقولها خدى

اصل احنا يا ستات هبل اوى وبيضحك علينا بالحاجات دى

ومش معنى ده ان كل الستات بترفرف بجناحات بالعكس فى ستات عاوزين ضرب النار فى ميدان عام

وفى ستات نكديه مقرفه ومش بترضى باى حاجه حتى لو الراجل اللى معاها زى الفل

والراجل هو اللى بيقود مختلفناش بس الراجل ده عاوز ايه من الست بتاعته

عاوزها طبعا فول اوبشن زى العربيات كده

تكنس تمسح وتبقى ست زى الفل وتبقى ست نغشه فى اى وقت واى مكان وطبعا طباخه بريمو بتعمل كل حاجه زى العسل زى احسن شيف وحلوانى فى مصر

هى دى دايما دى الصفات العامه اللى كل واحد عاوزها فى الست اللى عاوز يجوزها

بس والله فى ناس بتحب بعضها اوى ومهما حصل بينهم لا مكن يفترقوا ابد ا حتى لو حصل ايه

الرجاله على طول ندمتنين على انهم اتخطفوافى سبابهم بالجواز اللعين اللى خلهم متكعبلين بالولاد ومسئوليات كتير

وانه لو مش متجوز كان زمانه عمل كل اللى فى نفسه وجاب كل الحاجات اللى كان نفسه كان يجبها

والستات على طول بتسب وتلعن فى الراجل اللى هى قاعده معاه وانها خلاص مربوطه بالعيال اللى هما ربطنها ومش عارفه تعيش حياتها

كل واحد مش عاجبه حاله ابدا . وكل واحد فاكر نفسه هو اللى صح والتانى هو اللى حمار وموصلش لطريقه تفكيره

وانه طبعا لا يمكن يعترفب اخطائه واى واحد يتسابق فى انه يخلى الطرف الثانى انه يعترف اانه غلطان ويعترف بغلطه احسن طبعا علشان المشكله تنتهى

بجد كان الله فى عون كل ست مها راجل مش فاهمها

وكان الله فى عون كل راجل مراته مش فاهماه


الخميس، 19 نوفمبر 2009

كرامه المصرى ........... بخ

اللهم لا اعنراض فى اى حاجه

بس هو ليه كده على طول فى حاله دفاع عن النفس

على طول بناخد على قفانا ولا بنرد

على طول متمسكين بشعارات فاضيه ولا ليها اى قيمه اصلا " اصل الوحده العربيه " " اصل احنا وطن واحد" اصل احنا اخو"

اخوه مين احنا كل واحد مننا ماسك سكينه للتانى ومخبيها ورا ضهره مستنى يضربه فى اى لحظه

من شويه سمعت ابراهيم حجازى وهو بيقول تن المصريين لايمكن يقاتلوا اى حد ولا يمكن يقهروا حد مصر دايما الاخت الكبيره

ما هو احنا على طول تحت رحمه الكفيل فى دول الخليج اللى يببيع ويشترى فيك على كيفه علشان لقمه العيش

واحنا على طول تحت رحمه الدول الغربيه وامريكا علشان متقطعش علينا المعونه اللى هى حياتنا

واحنا اللى على طول تحت رحمه دول المغرب العربى سواء الجزائرين او التونسه علشان خاطر الاستثمارات المصريه اللى هناك

المهم ان احنا دايما تحت رحمه حد . حد يزلنا ويحط مناخرنا فى الارض على طول

طيب ما احنا فى بلدنا حطين بوزنا فى الارض من الحوجه والفقر وقله الحيله

يبقى ليه بقى بقى الاغراب ميعملوش كده واكثر

ده بيحصل على طول علشان على طول مدين ادينا . الفقر والحوجه اللى عمل فينا كده

الحكايه مش حكايه ماتش اتغلبنا فيه ولا حتى فزنا فيه

الحكايه انها الحاجه اللى اظهرت اللى فى النفوس . واظهرت برضو قله حيلتنا فى اى حاجه

احنا كلنا بنحب مصر معملتش فينا حاجه بس كرهنا اللى عمل كده فى مصر

يا جزايرين وكل اللى زيكم طوزز وفى مليون داهيه

الللهم لا اعتراض دى مشيئتك يا رب ولا اعتراض عليها

بجد بجد كرامتنا انتهت ومحدش يقول وحده عربيه ولا بتنجانيه

الخميس، 12 نوفمبر 2009

نفسى اكون عروسه تااااانى




مع انتى عملت فرح ولبست فستان ابيض وعملت كا المراسم بتاعه الافراح

نفسى البس تانى فستان فرح واكون عروسه

البس فستان اكون مختاره وماجره زى ما عملت اول مره وعلى يلبس بدله سودا حلوه ونتصور

والبس حمزه بدله شبه بتاعه باباه . والبس رقيه فستان ابيض وبعد الصوره اللى اتصورها انا وعلى نتصور بالعيال

قلت لعلى الفكره دى قاللى حتبقى كويسه حتبقى كويسه

بس بجد انا عاوزه اكون عروسه تانى و نروح نقعد على البحر ونتمشى ونتصور زى العرسان على البحر

نفسى اعمل فرح تانى . وعريسى يجبلى ورد ابيض مع احمر و اكون فرحانه نفس فرحه الفرح

وجايز احس باحساس جديد اما اشوف اولادى مبهورين باللى احنا عملينه

على بيقولى ان ده جنان قلتله امشى ورايى بس واحنا نعملواوانت حتنبسط وانا كمان حتبسط اوى

انا عاوزه اكون عروسه والبس فستان
. مليش دعوه

الأحد، 8 نوفمبر 2009

البوتى يا عينى على البوتى

الاستاذ حمزه بقى عمره دلوقتى سنه و3 شهور . وطبعا كان لازما على كأم تربويه ابدا اعوده على البوتى

والبوتى للى مش يعرفها هى بالبلدى كده القصريه اللى كنا بنعمل فيها زماااان

بس قلنا خلينا ناس كويسين ونقول بوتى احسن وشكلها احلى من قصريه دى

وعلشان على يترحم من البامبرز اللى بقاه عندنا زى الاكل والشرب

المهم نقوم الصبح ونقلعه البامبرز واقعد يا مازو علشان تعمل بيبى

واقعد انا وابوه نغنيله الاغنيه اللى كنا مقلقينها اما كنا بنعود روكو على البى بى

ونعنى وبصوت عالى " بى بيه بى بيه مازو بيعمل بى بيه " . وكنا قبل كده بنقول روكو

وده لا على حامى ولا على بااارد ويقعد يعييييط وبصوت عالى اوى

تخيل نفسك لسه صاحى من النوم وعيل يقعد يصوت جوه صرصور ودنك

وكانك مقعده على شوك ويقعد يعيط ويصوت وانا وابوه نقول يالا يا مازو اعما بى بى

وبرضو مفيش اى فايده

ووصل بيه الحال انى اخد البوتى هانم على رجلى وهو قاعد عليها علشان يرضى يعمل اى حاجه وهو لايمكن ابدا

واقعد العاب انا وعلى ونهشتك علشان البى بى يتعمل ومفيش اى اى فايده

واحنا جبنا بوتى جديده على شكل عربيه وعلشان يرضى يعمل فيها ولا اى حاجه نافعه

ولعبته كل الالعاب وبرضو مفيش فايده .؟ واقوله يا بنى ظفرها بس حتى وهو مش عاوز

شكل البوتى دى انا اللى حعمل فيها اخر ما اصاب بالياس

وصوره البوتى الملكيه دى اهداء لمازو علشان اقوله " بى بيه بى بيه ماوز مش عاوز بى بيه"

الخميس، 5 نوفمبر 2009

مؤتمر الحزب الوطنى اتفرج واضحك


من كام يوم كده كنت قاعد الصبح وبقلب فى التليفزيون لقيت على قناه المحور مؤتمر الحزب الوطنى

فلت وماله اما اسمع بيقولوا ايه . ويا ريتنى ما اقعدت اسمعه والله مت على نفسى من الضحك

بس والله يموت من الضحك سمعت احمد عز الراجل الغنى بتاع الحديد واللى متجوز ست برضو غنيه بيكلم عن ايه بقى

بيكلم ان الحاله الاقتصاديه زى الفل وان كل حاجه تمام وان مصر تطورت فى عهد الرئيس مبارك طبعا . ةان السنه اللى فاتت اتباع بتاع

250 الف سياره وان ده دليل على ان الناس مرتاحه وكله ميه ميه وان ده شعب ابن ستين فى سبعين ومش بيقدر جهود الحكومه والحزب

وطبعا وجه تحيه لجمال اللى هو رائد مفجر ثوره التحديث والتطوير . وسمعت الكلمتين دول ومت على نفسى من الضحك وقلت فى عقل بالى

هو جمال اصلا عمل ايه فى البلد علشان يكون مفجر ثوره التحديث . وانهى تطوير اللى جمال فجره فى وشنا

ده كل اللى قاله فى الخطاب بتاعه هو ان الشعب المصرى ده اصلا مش بتاع شغل ومش بيحب يتحرك بس كده

والمفاجات زادت اوى والقرع اشتغل ووكلمه لكلمه من نائب فى مجلس الشعب لحد ما نوصل لرئيس رابطه على قده كده

وكلهم مشين فى خط واحد بس هو القرع والنفاق اللى هما شربينه ولازم يرجعوا فى ودانا . علشان نعرف الحزب قد ايه جميل ومريح وكله

بهجه وجمال هو صانع البهجه دى . ده وصل القرع انه جابوا رئيس رابطه مزارعين مش عارفه بلد ايه كده

طالب الحكومه انها تزاود وتشيل الدعم على رغيف العيش . يا خبر اسود ومطين بستين نيله واحد مصرى فلاح عادى يعنى اكيد مش

بيشترى العيش اللبنانى عاوز العيش يغلى يا صلاه النبى احسن . وصل بيهم الامر انهم بيخلوا الناس يبيعوا ضميرهم

ويبيعوا البلد والناس كلهم علشان خاطر الحزب وعلشان خاطر عيون جمال المفجر .

حسبى الله ونعم الوكيل

الجمعة، 30 أكتوبر 2009

هى بيانسيه جايه ملط امتى؟



الا مش صحيح احنا مش فى نكبه حقيقه ولا بيكدبوا علينا

مش لسه جثث قطار العياط دى مرميه على الارض ؟

هو مش لسه دمهم مبردش اصلا

هو مش لسه دموع اهليهم واماهتم واولادهم منشفتش

بس هى البجاحه دى جت منين . يكون عنك ميتم فى الشارع بتاعك وقدام بيتك وتروح تعلق الانوار علشان الفرح

لا واللهدى حاجه تفور الاعصاب نكون عندنا حادثه كبيره كده زى قطر العياط ده ونروح نجيب الست بيانسيه علشان تواسنا شويه

ماهو ساعه لربك و50 ساعه لقلبك . وواللى زاد وغطى كميه الاعلانات اللى كل شويه يجبوها علشان الحفله

وتظهرلنا الست بيانسيه برجليها العريانه عاشان ترقص وتمايل

اهم حاجه الشعب المصرى يتبسط

بس والله لو كان الشعب المصرى هو اللى حيتبسط كنا قلنا وماله بس اللى حيتبسط هما الكريمه

ااه والله كريمه المجتمع اللى قدرين يروحوا حفله اكلفت مئات الملايين

واللى بيقدروا يدفعوا تذكره لحفله واحده بتعنى وترقص فيها ب 1000 و2000 جنيه اه والله اسعار التذاكر كده

اهم حاجه ان محبى الاخت بيونسيى يفرحوا والبلد فيها ميتم كبير

علشان احنا دمنا ارخص حاجه فى عيون بلدنا . واللى هما عاوزينه حيعملوا سواء اعترضا اناه تيجى ولا لا

اهم حاجه بقى بيونسيى تعمل بملاينا اللى هى وخدها وتبين كوارعها كويس. الست واخدلها يجى مليون ونص دولار كده


الأربعاء، 28 أكتوبر 2009

عشنا وشفنا

واخيرا والحمد لله عشنا وشفنا ان فيه وزير استقال

الحمد لله شفتها قبل ما اموت

وزير وزير قاعد فى الحكومه يستقيل

ده بيحصل اللى انقح من كده 100 مره وبرضو محدش بيهون عليه يسيب الكرسى

زى ما يكون الكرسى لازق فيهم

بس اشمعنى الريس قال لوزير الثقافه لما اتوكس فى انتخابات اليونسكو حط ورا ظهرك ومطيبش خاطر وزير النقل وقاله برضو ارمى ظهرك

اكيد غلاوه وزير الثقافه اكتر بكتير من غلاوه النقل

برضو عشره بقالها 28 سنه ماتت ناس وحيى ناس

ووزير الثقافه مرضيش يستقيل علشان مينولش اليهود اللى فى بالهم

طب ينولنا احنا اللى فى بالنا

الثلاثاء، 27 أكتوبر 2009

حد يلحقنى من حمزه

حمزه ابنى انا خلالالاص مش عارفه اعمل معاه ايه

الاستاذ حمزه اولا بيصحى كل يوم ومن اول ما اتولد وهو لازم يصحى الساعه6 صباحا او قبل كده ومش بعد كده الا فى حالات نادره جدا
تانى حاجه بيقوم الصبح وهو على عاتقه ومهمته الاولى انه ازاى ميخليش حاجه فى حالها ابدا بدايه من السجاد وحتى التليفزيون والكمبيوتر
يقوم يوقع كل حاجه وينزل كل حاجه ويكسر كل حاجه
ومش بيقعد ابدا
اقول اشغل التليفزيون علشان يلهيه شويه ولا بيلهيه ولا حاجه
يقوم طالع من ترابيزه التليفزيون لحد فوقه ويخبط عليه جامد اوى او انه يلطلع يقعدفوقه من غير اى خوف انه يقع مثلا
يدخل جوه الغساله الاتوماتيك ويدخل الاوضه ويقفل على نفسه وافتح الباب يقوم قافل الباب تانى وهكذا نفضل على الحال المنيل ده لحد ما انا اللى اتعب. كله كوم بقى الحمام كوم تانى حمزه بيه بيموت فى حاجه اسمها حمام سواء فيه حد او مفيو ش
يعمل بقه اللى ربنا يقدره عليه يرمى الشامبوهات جواه التواليت
او ياخد الزهره بتاعه الغسيل ويلون بيها الارض علشان لونها مش عاجبها
او يفتح الميه ويمشى او يحط راسه جواه التواليت يعنى يعمل اى حاجه مقرفه
يخلص الحمام يروح المطبخ يفتح دواليب المطبخ ينزل الحلل او يوقع الزيت او يقلب الدقيق او يقلب السكر

امبارح قاعده فى الاوضه بشوف الاخبار وفجاه كده مسمعتش اى صوت ليه قلت اااه ده فى مصيبه كبيره اوى اوى
رحت المطبخ ويا ريتنى ما رحت لقيته قالب تقريبا نص زجاجه زيت وعليه دقيق وشكل الارض مش طبيعى
قلت بقه احط عليهم سكر واعمل كيكه اكلها بدل ما اكل فى نفسى
بيتنك بقى عامل زى ما يكون حد دخل يفتشه ومشى على راى على هو امن الدوله فتشت بيتنا ولا ايه
بكنس الاوضه فوق ال 3 مرات كل يوم
بشيل الهدوم اللى بيوقعها من الدواليب وبيجرى اكتر من 5 مرات فى اليوم
بلم وراه طول اليوم
بيطلع فوق كل حاجه واى حاجه
وركو والله من اول ما بتيجى من المدرسه وهى وراه
مش بعرف اقعد فى اى حته او مكان وهو معايا .بيزهق كل اللى حوليا طبعا وبيجروا وراه معايا
شاهى ونورا حلفوا بحياته يوم ما اتقبلنا
حد يلحقنا منه والنبى
.
ربنا يهديه يا رب ويخليه لينا
الا هو ان شاء الله ربنا بيهدى العيال على سن كام ؟
علشان اطمن وارتاح
علشان انا تعبت والله

السبت، 24 أكتوبر 2009

اغيثنا من يا رب

اللهم لا حول ولا قوه الا بالله العلى العظيم
حنقضل امتى فى بلدنا نداس ونموت وملناش ديه من اى حد
لما فتحت التليفزيون ولقيت خبر تصام القطارين العياط والله العظيم اتنكدت جدا
يا خبر اسود هو احنا مش حنسلم من اهمال حكومتنا
نعمل ايه بس يا رب الضرايب وبندفع
كل خطوه فى البلد دى بفلوس وبندفع
كل رسوم تزيد على اى حاجه وكل حاجه وبرضو بندفع
دفعنا كل حاجه علشان نعرف بس نعيش ومش عارفين
دفعنا ولادنا اللى كل يوم بيموتوا من الاهمال فى المستشفيات والسرطان والبلاعات المفتوحه وبرضو مداسين
دفعنا روحنا ودم اجدادنا علشان ندافع عنها ونحميها وهى محمتناش
دفعنا حتى نفسنا اللى هو رخيض اوى عند الحكومه وبرضو منفعش
دفعنا دموعنا وقله جيلتنا وقهرنا وبرضو متنصفناش من حد
نعمل ايه بس يا رب
نعمل ايه واحنا كل حاجه فى البلد دى بتخر قذاره وعفانه واهمال
للكى الله يا ام ياللى مستنيه ابنك وهو راجعلك
لكى الله يا اختى ياللى مستنيه جوزك يرجعلك
لك الله يا ابنى يا اللى مستنى ابوك يدخل عليك ومش حيدخل عليك تانى
كفايه علينا اعلانا رمضان بتاعه السكه الحديد اللى دفعناها من دم قلب كل واحد فينا ودفعنا 30 مليون جنيه علشان طارق نور والحاشيه تسترزق واللى خدعونا فيها وقالولنا انهم جددوا كل حاجه
كفايه ان الاغنياء زادوا غنى والفقراء مش لقين ياكلوا
كفايه بقى دوس على رقبينا كل ده
بقينا فى بلدنا اغراب مش عيشين

لكى الله يا مصر
لكى الله يا مصر

وانا لله وانا اليه راجعون
ولا حول ولا قوه الا بالله العلى العظيم

الخميس، 22 أكتوبر 2009

طول ما انت بخير





طول مانت بخير انا بخير انا متطمن عليك

انا شايفك سنة والتانية بتكبر وبشوف روحى فيك

بتمنالك عيشة حلال ستر وصحة وراحة بال
عين مليانة ورضا بالحال
بدعى تكون بعدى وحياتك سند ف الدنيا لاخواتك ويقولو ابنى راجل عال

دمعك تعبك نقط ضعفى عايزك جد مستعفى حبيبى ماتنكسرش ف يوم

مش انت طول عمرك بتقلدنى عايزك تبقى زى اوعدنى ف عز ضعفك شد وقوم

و طول مانت بخير انا بخير انا مطمن عليك
انا شايفك سنة والتانية بتكبر وبشوف روحى فيك


اغنيه رائعه لهشام عباس سمعتها بالصدفه وطبعا كلماتها فيها ريحه المبدع والرائع ايمن بهجت قمر والى بيكتب كل احاسيس البشر على ورق شفاف مفيش بينهم حواجز

الثلاثاء، 20 أكتوبر 2009

هو احنا صحيح مرضى ؟

هو صحيح الناس كلها مريضه

هو صحيح الناس كلها مصابه بامراض نفسيه حتى لو كنا كلنا ظهرين قدام بعض اسويا

بس احنا فعلا كلنا عندنا شيزوفرنيا . كلنا بنقول ان احنا بنكره الكدب وبنكدب

بنكره السرقه وبنسرق

نكره الخيانه وبنخون

وبنظهر مثالين اوى اوى

شفت مره فى التليفزيون برنامج بيسال الناس انت بتكذب ؟

كل الناس قالت لا طبعا مش بعرف اكذب بيبان عليا( يا سلام )

ولو سالت الناس بتسرق حيرد عليك برضو ب لالالالالالالالالالا انا عمرى ما سرقت

ليه عمرما حد سرق ان شاالله نظره مش من حقه انه يسرقها

عمر ما حد سرق نجاح حد

عمر ما حد سرق عقل وعمر حد تانى

اكيد كلنا اتسرقنا وسرقنا

وطبعا الكذب حدث ولا حرج

ولو سالت الناس برضو انت خنت قبل كده حيقولك لا اكيد الخيانه مش فى طبعى

مع ان الخيانه فى طبع ناس كتير اوى

اللى خان بتفكيره فى واحد تانيه غير مراته واللى خانت بععقلها وتفكرها فى واحد تانى غير جوزها مش دى خيانه برضو

واللى بيجيب سيره حد بيعمل قدامه انه حبيب مش دى خيانه

امال لو الناس كلها مش بتكدب ولا بتخون ولا بتسرق

امال الدنيا ليه وحشه وفيها ناس وحشه كتير

امال مين اللى بيكدب ومين اللى بيخون ومين اللى بيعمل حاجه وحشه

امال مين ولاد الذينا ؟

امال الشيطان بيشتغل على مين ؟

الشيطان بيشتغل على كل الناس

سبحانك يا رب دى حكمتك وحنا راضين بيها

اللهم انا لانسالك رد القضاء ولكنى نسالك الطف فيه